José Luis Álvarez Lauret (Cuqui el de Lala)
Pepón, que siempre fue un poco trastu, agora que ya ye vieyu anda tou esgarrapau, llevando los pantalones con un cordel amarraos; la bragueta, siempre abierta, sin un botón abrochau, que la faga más discreta; la camisa remendá y en sin meter la faldeta. Un día que de estes traces, caleyaba dando vueltes pol mercau, topose con Casildona, que ni soñaba alcontralu, y entós en sin querer ella, y a puntu de tropezalu, echoi una güeyaduca rápida de arriba abaxu, fijando la so atención al pasu por el ventanu, y viendo que taba abiertu y asomandose el calzón, soltoi muy guasonamente: –A ver si mires, Pepón; que lleves la puerta abierta y en sin echai la pesllera; mientres andes pol mercau, sin mirar nin date cuenta, de la risa que provoques en la xente que te alcuentra. Entós Pepón que aunque vieyu, noi patina la mollera, atrapoi la so indireta, y tan prestu como un rayu, contestoi de esta manera: –La puerta que tú comentes, nun necesita pesllera, que en esa casa nun viven; la que vivió, ya ta muerta. Así que nun te preocupes si tien la puerta piesllá, o si siempre queda abierta, que de ahí nun sal ni el gatu, por muchu ratón que güela, o lu venga a provocar a la mismísima puerta. Casilda que pretendía, tomai el pelo a Pepón, salió asina mal pará, y colorá como un pitu, marchó sin mirar pa tras, al ver que Pepón ye vieyu, pero nun ye un mentecatu del que se puean guasar, ni tratar como a un pazguatu, por muy mal vestiu que vaya o asemeye ser un trastu.
No hay comentarios:
Publicar un comentario